Shriftlar sohibi
Monotype Imaging Holdings Inc. – ommaviy axborot vositalari, reklama, poligrafiya, nashriyot ishi va dasturiy ta’minotni ishlab chiqarishda qo‘llaniladigan shriflarni raqamli sahifalash (vyorstka) va dizaynini yaratish bozoridagi jahon yetakchilaridan biri. Aynan shu kompaniya har bir Microsoft Office foydalanuvchisiga tanish bo‘lgan afsonaviy Times New Roman shrifti, shuningdek 150 mingdan ortiq boshqa shriftlar bo‘yicha huquqlarga egalik qiladi. Ularning orasida klassik shriftlar qatorida, millionlab odamlar har kuni foydalanadigan mutlaqo yangi shriftlar ham mavjud.
2023-yilda bozordagi kapitalizatsiyasi taxminan $819,7 millionga baholangan kompaniya $2,3 milliard mablag‘ hajmi bilan bozorda yetakchi o‘rinni egallagan. Monotype istalgan did va talab bo‘yicha shrift va dizayn-echimlarni yaratib beradigan dunyodagi 1400ta hamkor ustaxonalar bilan ishlaydi. Bu Monotype kompaniyasini dunyodagi barcha dizayner va brendlar uchun afzal manbaga aylantiradi.
Raqamli shriftlar va sahifalash uchun yechimlar bozori yuzaga kelganiga atigi bir necha o‘n yil bo‘lganiga qaramay, Monotype – yuksalish va qulashlarni boshidan o‘tkazgan yuz yildan ortiq tarixga ega kompaniya. U 1887-yilda paydo bo‘lgan va dastlab Lanston Monotype Machine Company deb nomlangan.
Monotype o‘n yilliklar davomida Buyuk Britaniya va AQShda kitoblar va jurnallar uchun matn terish sohasida yetakchi o‘rinni saqlab kelgan. Biroq 1960-yillarda kompaniyada texnologiyalar rivojlanishi bilan bog‘liq qiyinchiliklar boshlangan. Kompyuterlar yordamida ishlaydigan fotonashr paydo bo‘lganligi sababli, issiq metall nashrga (matn alohida metall harflar yoki belgilar yordamida teriladigan bosib chiqarish usuli) bo‘lgan talab kamaya boshlagan.
1990-yillarga kelib kompaniya to‘qnash kelgan moliyaviy inqiroz ortidan uning qayta tashkil etilishi va biznes-strategiyasining o‘zgartirilishi amalga oshirilgan. Monotype o‘z kutubxonasini kengaytirish va raqobatchi kompaniyalarni xarid qila boshlash evaziga shriftlarni sotish yo‘nalishini tanlagan. Jami bo‘lib 12ta kompaniya, jumladan oxirgi besh yil ichida beshta kompaniya xarid qilingan. Ularning orasida vizual kontentni yaratish uchun mo‘ljallangan Olapic platformasi hamda yuqori sifatli shriftlarga ega Hoefler&Co nufuzli bosmaxonasi ham bor.
Eng e’tiborli xaridlardan biri dizayn-studiyalari va alohida mutaxassislar o‘z shriftlarini mustaqil grafik dizaynerlarga, mijozlarning loyihalarini sotib oladigan reklama agentliklariga yoki yirik brendlarga sotishi mumkin bo‘lgan MyFonts marketpleysi bo‘ldi. MyFonts foydalanuvchilarga 250 mingdan ziyod shriftlarni sotadigan 4,5 mingta quyma ustaxonalar bilan ishlash imkoniyatini yaratadi.
Shu tariqa, Monotype ham iste’mol, ham korporativ bozori uchun mahsulotlar va xizmatlarning keng ko‘lamini, jumladan shriftlar, dasturiy ta’minot va veb-shriftli yechimlarni taklif qiluvchi eng yirik bozor ishtirokchisiga aylangan. Bu mijozlarga ko‘plab platformalarda kontent yaratish va kengaytirish imkonini beradi.
Domenlar hukmdori
GoDaddy – domen nomlariga va internet-xostingga sohasida, ya’ni veb-saytlarni yaratish va qo‘llab-quvvatlashning eng muhim bosqichlariga xizmat ko‘rsatish sohasidagi global o‘yinchi. ICANN internet rahbariy organi tomonidan akkreditatsiyalangan kompaniyalar orasida GoDaddy so‘nggi o‘n yillik davomida tengsiz yetakchi bo‘lib kelmoqda. 2023-yilning dekabr oyi holatiga kompaniya 76 milliondan ortiq domen nomlari, ya’ni veb-sayt manzillariga xizmat ko‘rsatadi va bu uning eng yaqin raqobatchisi – NameCheap kompaniyasi ko‘rsatkichlaridan 4,5 baravarga ortiq.
Bundan tashqari, GoDaddy veb-xosting jami global bozorining taxminan 3,1 foizini egallagan holda, muntazam ravishda ushbu biznesdagi eng yirik ishtirokchilar top-beshtaligiga kiradi. Mazkur ro‘yxatda texnologik sohaning Google va Amazon kabi “mastodontlari” o‘rin olgan.
2022-yilda sof foydasi 45,3 foizga – $352,9 milliongacha o‘sganini ma’lum qilgan kompaniya chorak asrdan buyon bozorda yetakchi pozitsiyalarni egallab keladi. Biroq u Google singari yangi bozor sohalarini qo‘lga kiritishga uringan holda o‘z xizmatlari qatorini shiddat bilan kengaytirishga urinmagan. 1997-yilda asos solingan GoDaddy taklif etiladigan xizmatlarning noyob to‘plamini yirik sport musobaqalaridagi axborot ishtiroki va shiddatli reklamadan tashkil topgan o‘ziga xos marketing strategiyalari bilan birlashtirgan holda, veb-xizmatlar bozorida o‘rnashdi.
2005-yilda kompaniya birinchi marta AQSh Milliy futbol ligasining final o‘yini hamda mamlakatdagi yilning eng ommalashgan televizion hodisasi – Superboulda reklama roligini taqdim etgan. Do‘ndiqqina qora sochli xonimcha GoDaddy.com yozuvi tushirilgan tor kiyimda senzura qo‘mitasi oldida raqsga tushayotgani tasvirlangan rolik milliy janjalni yuzaga keltirishi bilan birga, kompaniyaga keyingi ikki yil mobaynida mijozlar bazasini ikki milliondan to‘rt milliongacha oshirish imkoniyatini bergan.
Mojaroli reklamadan tashqari, mijozlarning o‘sishiga yaxshi o‘ylangan biznes-strategiya ham xizmat qilgan: GoDaddy kichik biznes va xususiy shaxslarga veb-mavjudlikni yaratish uchun jami vositalar ko‘lamini taqdim etishga e’tibor qaratgan. 2010-yillar davomida kompaniya hattoki eng kichik texnik topshiriqqa ega bo‘lganlar ham foydalanishi mumkin bo‘lgan veb-xizmatlar provayderiga aylanib, xizmatlari ro‘yxatini faol kengaytirdi. GoDaddy domen nomlarini ro‘yxatdan o‘tkazish jarayonini keskin soddalashtirib, saytlarni ilgari surish vositalarini joriy qildi.
GoDaddy o‘zining global bozorni egallash maqsadi doirasida butun dunyo bo‘ylab turli mamlakatlar, jumladan Hindiston, Kanada, Avstraliya va Yevropa davlatlarida ofislarini ochdi. Bu qadamlar kompaniyaga xalqaro bozordagi ishtirokini mustahkamlash, AQSh tashqarisidagi mijozlar bazasini kengaytirish hamda tarmoqdagi eng taniqli brendlardan biriga aylanish imkonini berdi.
Mikrochiplar qiroli
TSMC, yoki Taiwan Semiconductor Manufacturing Company – bironta ham smartfon, kompyuter yoki server ishlay olmaydigan yarim o‘tkazgichli mikrosxemalarni ishlab chiqarish bo‘yicha mutlaqo jahon yetakchisi hisoblanadi. 2023-yil ma’lumotlariga ko‘ra, kompaniya global ko‘lamda bozorning 60 foizdan ortiq ulushini saqlab kelmoqda. Taqqoslash uchun: TSMC kompaniyasining asosiy raqibi – Samsung Foundry qariyb 13 foiz bozor ulushi bilan ikkinchi o‘rinni egallagan.
Kompaniya 1987-yilda tashkil etilgan va vaqt o‘tishi bilan ko‘plab yetakchi texnologik kompaniyalar uchun shartnoma asosida chiplarni ishlab chiqarish orqali yarim o‘tkazgichli mahsulotlar bozorida asosiy pozitsiyani egallagan.
TSMC ishlab chiqarishga nisbatan innovatsion yondashuvi bilan o‘z sheriklari ishonchini qozongan: u hech qachon tadqiqotlar va ishlanmalarga pul ayamagan va mijozlarga eng ilg‘or texnologik yechimlarni taklif qilgan.
Shu tariqa, TSMC 7 nanometrli texnologik jarayondan foydalangan holda chiplarning ommaviy ishlab chiqarilishini o‘zlashtirgan birinchi kompaniyalardan bo‘lgan va bu uning bozordagi raqobatbardoshligini sezilarli darajada oshirgan. 7 nanometrli jarayon unumdorlik 20 foizga yaxshilanishini hamda avvalgi – 10 nanometrli jarayonga nisbatan 40 foiz energiya iste’moli tejalishini ta’minlaydi. Bu xususiyatlar jarayonning joriy etilishini yarim o‘tkazgichli texnologiyalar rivojlanishida muhim bosqichga aylantirgan.
Innovatsiyalarga e’tibor qaratish va noodatiy biznes-model TSMC kompaniyasini 1994-yildan buyon 16,1 foiz o‘rtacha yillik o‘sish sur’atlari bilan ta’minlashdan tashqari, kompaniya aksiyalarini Nyu-York fond birjasida joylashtirish imkonini bergan. Tez orada kompaniya AQShda birinchi zavodini ochib, xalqaro maqomga erishgan.
2022-yilda TSMC 532ta mijoz, jumladan Apple va NVIDIA kabi gigantlar bilan ishlab, turli qo‘llanilish sohalari, jumladan smartfonlar, avtomobillar va raqamli maishiy texnika ishlab chiqarilishi uchun 12 698ta yuqori texnologiyali mahsulotlarni tayyorlab bergan.
To‘lov tizimlari xo‘jayini
2021-yilda Block Inc. nomini olgan Square Inc. kompaniyasi – kichik biznes uchun yuqori texlogiyali yechimlar majmuini taklif qiluvchi eng yirik platformalardan biri bo‘lib, faqatgina 2022-yil davomida ushbu yechimlar yordamida 4 million sotuvchi umumiy qiymati 186 milliard dollarga teng 4 milliard tranzaksiyalarni amalga oshirgan. Kompaniya faqat 8 mamlakatda faoliyat yuritadi: Ispaniya, AQSh, Irlandiya, Fransiya, Buyuk Britaniya, Avstraliya, Yaponiya va Kanada. Shunga qaramay, moliyavyi bozor haddan tashqari parchalangan bo‘lsa-da, Square yetakchi o‘rinlarni egallash bilan bir qatorda, bu sohada haqiqiy kashshof hisoblanadi va uning rivojlanish yo‘nalishlarini belgilab beradi.
Kompaniyaga 2009-yilda yakka tartibdagi tadbirkorlar uchun ko‘chma to‘lov terminalini yaratish g‘oyasi muallifi, Twitter hamasoschisi Jek Dorsi ishtirokida asos solingan. Shu tariqa, kompaniya smartfon yoki planshetga ulanganidan so‘ng ularni ko‘chma to‘lov terminallariga aylantiradigan tarixdagi birinchi ko‘chma kard-riderni yaratgan. Bu yechim to‘lovlarni qabul qilish jarayonini erkinlashtirishda muhim ahamiyat kasb etgan holda, kichik biznes va yakka tartibdagi tadbirkorlarga yirik kompaniyalar bilan raqobatlashish hamda elektron tijorat sohasida o‘z ishtirokini kengaytirish imkoniyatini berdi.
Square POS tizimi ham to‘lov o‘tkazmalari va ma’lumotlarga ishlov berishga nisbatan yondashuvi yuzasidan yangilik hisoblanadi. Square bizneslar, jumladan mijozlar bazasini kengaytirishni va zamonaviy to‘lov usullarini taklif qilishni xohlaganlarga foydali bo‘lishi uchun xaridorlardan to‘lov undirish o‘rniga, vositachilik haqini sotuvchilardan yechib olgan. Square shuningdek moliyaviy tranzaksiyalar sohasida o‘ta muhim hisoblanuvchi ishonchli xavfsizlik va ma’lumotlarni himoyalash tizimini taklif qilgan.
Kompaniya 14 yillik faoliyati davomida mahsulotlari qatorini 36 taklifgacha, jumladan kichik biznes uchun Square Capital xizmati orqali mikroqarzlar va Square Card to‘lov kartalariga kengaytirdi. Kompaniya kichik biznes uchun mijozlar bilan o‘zaro munosabatlarni yaxshilaydigan va biznes-jarayonlarni osonlashtiradigan ixtisoslashtirilgan vositalar va yechimlarni taklif qiluvchi noyob platformani barpo qilgan. Kompaniya faqat sakkizta davlatda faoliyat yuritishiga qaramay, u boshlab bergan trendlar butun dunyoni qamrab oldi va ko‘chma kard-riderlarni jahonning istalgan mamlakatida bozor standartiga aylantirdi.
Noo‘rin joyda, nojo‘ya vaqtda
YouTube
Dzen
Telegram